台灣囡仔歌佮唸謠
節錄自鄭安住整理
1掩咯雞
掩咯雞，走白蛋，隨你食，哎喲隨你鑽。咯雞仔囝，哎喲覕密密，鳥鼠仔囝偷做賊。
一支刀咧一支劍，欲走毋走，毋通哮，毋通哮。
2一放雞
一放雞，二放鴨，三分開，四相疊，五搭胸，六拍手，七圍牆，
八摸鼻，九扭耳，十抾起，十一拍塗跤，十二攏總挲。
3點仔點水缸
點仔點水缸，啥人放屁爛尻川。點仔點茶甌，啥人今晚來阮兜。
點仔點茶鈷，啥人今晚欲娶某。點仔點叮噹，啥人今晚欲嫁翁。
點仔點仔點水缸，啥乜人放屁爛尻川。
點仔點仔點冊包，啥乜人今晚欲來阮兜。
點仔點仔點鉛筆，你若是歹囝才做白賊。
點仔點仔點紛紛，你是英雄好漢去做兵。
4一的炒米芳
一的炒米香，二的炒韭菜，三的強強滾，四的炒米粉，五的五將軍，
六的六囝孫，七的蚵仔飼麵線，八的講伊欲分一半，九的九嬸婆，
十的撞大鑼。拍你千、拍你萬，拍你一千零五萬。羞羞羞袂見笑，
臆輸毋甘願，耍輸起嗄龜，毋甘願起嗄龜，我欲來去投老師，投老師。
5草暝仔公
草暝仔公，穿紅褲，趕牛去買布，趁錢通娶某。
新娘仔大腹肚，正月生查甫，二月生查某，打銅鑼，撞大鼓。
6天烏烏
天烏烏，欲落雨。舉鋤頭，清水路，清著一尾鯽仔魚欲娶某。龜擔燈，鱉拍鼓，
田嬰舉旗叫艱苦。毛蟹擔燈雙目吐，水雞扛轎大腹肚，一碗圓仔湯共你補。
7白鴒鷥
白鴒鷥，捙糞箕，捙到溪仔墘。跋一倒，抾著二鮮錢。
一鮮儉起來好過年，一鮮買餅送大姨。
8月姊姊
月娘娘，月姊姊，阮是無張遲指著你，請你毋通來受氣。攏是咱家己，攏是咱家己。
月娘娘，月姊姊，你是阿姊，阮是弟，請你毋通舉刀仔，割我的雙爿耳。
9西北雨直直落
西北雨直直落，鯽仔魚欲娶某。鮕鮐兄拍鑼鼓，媒人婆仔土虱嫂，
日頭暗揣無路，趕緊來火金姑，做好心來照路，西北雨直直落。
西北雨直直落，白鴒鷥來趕路。搬山嶺過溪河，找無岫跋一倒，
日頭暗欲怎好，土地公、土地婆做好心來帶路，西北雨直直落。
10一、二、三、四
一、二、三、四，一、二、三、四，囡仔人驚著無代誌，無代誌，
土地婆仔會保庇，保庇你細漢好搖飼，保庇你大漢會順適，會順適。
一、二、三、四，一、二、三、四，囡仔人褪衫無代誌，無代誌，
土地公仔會保庇，保庇你細漢好搖飼，保庇你大漢會順適，會順適。
11落大雨
落大雨，透大風，天烏地暗霆雷公。門口積滿水，有路行袂通。
落大雨，透大風，雞仔鴨仔驚雷公。避去簾簷跤，驚共戇戇戇。
12丟丟銅仔
火車行到伊著阿妹伊搭丟，哎約，磅空內。
磅空的水伊著丟丟銅仔，伊著阿妹伊搭丟啊，伊著滴落來。
13培墓
紅田嬰，紅貢貢，騎牛騎馬來培墓。大兄排紅龜，二兄排牲禮，三兄燒香擱點火。
飼牛囡仔圍來分墓粿，墓粿分無夠，豆干鴨卵提來湊。
14點仔膠
點仔膠，粘著跤，叫阿爸，買豬跤，豬跤箍仔，焄爛爛，枵鬼囡仔流喙瀾。
15人插花、伊插草
人插花，伊插草。人抱嬰，伊抱狗。人未嫁，伊先走。人坐轎，伊坐畚斗。
人睏紅眠床，伊睏屎礐口。人睏紅眠床，伊睏屎礐口。
16坐飛機
坐飛機，看天頂。坐大船，看海湧。坐火車，看風景。
坐公車，錢較省。坐牛車，順紲挽龍眼。
17火金姑
火金姑來食茶，茶燒燒，食芎蕉。芎蕉冷冷，食龍眼。
龍眼愛剝殼，換來食那菝。那菝仔全全籽，害阮食一下落喙齒，害阮食一下落喙齒。
18台灣小吃
大頭大頭生後生，唱歌欲唱Do Re Mi。Do Re Mi，Do Re Mi 大頭仔賣肉羹。
肉羹結規丸，大頭仔講伊欲賣肉丸。肉丸歹食無人買，大頭賣碗粿。
碗粿碗粿冷吱吱，大頭氣著賣花枝。花枝花枝真臭臊，大頭換來賣米糕。
米糕燒滾滾，大頭講伊欲賣米粉。米粉爛爛真細碗，大頭毋知欲按怎？
19嬰仔睏
嬰仔嬰嬰睏，一暝大一吋。嬰仔嬰嬰惜，一暝大一尺。
抱囝日落山，抱囝金金看。你是我心肝，驚你受風寒。
嬰仔嬰嬰睏，一暝大一吋。嬰仔嬰嬰惜，一暝大一尺。
一點親骨肉，愈看愈心適。暝時搖伊睏，天光抱來惜。
嬰仔嬰嬰睏，一暝大一吋。嬰仔嬰嬰惜，一暝大一尺。
同是一樣囝，哪有兩心情。查甫也著疼，查某也著成。
嬰仔嬰嬰睏，一暝大一吋。嬰仔嬰嬰惜，一暝大一尺。
細漢塗跤爬，大漢欲讀書。為囝款學費，責任是咱的。
嬰仔嬰嬰睏，一暝大一吋。嬰仔嬰嬰惜，一暝大一尺。
疼囝像黃金，成囝消責任。養到恁嫁娶，我才會放心。
20搖囝歌
搖仔搖，搖仔搖，搖囡仔愛睏愛人搖。搖囡仔，搖囡仔，愛睏愛人搖。
21一年仔倥倥
一年仔倥倥，二年仔孫悟空，三年仔吐劍光，四年仔愛膨風，
五年仔上帝公，六年仔閻羅王，閻羅王。
22十二生相
一鼠賊仔名，二牛駛犁兄，三虎爬山崎，四兔遊東京，五龍皇帝命，六蛇予人驚，
七馬跑兵營，八羊食草嶺，九猴爬樹頭，十雞啼三聲，十一狗顧門埕，十二豬菜刀命。
23樹頂一隻猴
樹頂一隻猴，樹下一隻狗。猴跋落來撞著狗。猴走，狗亦走。毋知猴驚狗，抑是狗驚猴。
24豆花車倒擔
豆花車倒擔，一碗兩角半。燒燒一碗來，冷冷阮無愛。
25羞羞羞
羞羞，羞羞羞，提籃仔抾雨鰡。羞羞，羞羞羞，提籃仔抾雨鰡。
攏總抾幾尾，哎喲，攏總抾兩尾啦，攏總抾兩尾。一尾煮來食啊嘖嘖，
一尾糊目睭啍啍，羞羞，羞羞羞。
26貧憚仙
一天過了又一天，身軀無洗全全鉎，走去溪仔洗三遍，毒死烏魚數萬千。
27秀才騎馬弄弄來
秀才、秀才，騎馬弄弄來，佇馬頂跋落來，跋一下真厲害。喙齒疼，糊下頷。
目睭疼，糊目眉。腹肚疼，糊肚臍。嘿！真厲害。
28天烏烏
天烏烏，欲落雨，阿公仔夯鋤頭欲掘芋。掘啊掘，掘啊掘，掘著一尾辿鰡鼓，
咿呀嘿叨真正趣味。天烏烏，欲落雨，阿公仔夯鋤頭欲掘芋。掘啊掘，掘啊掘，
掘著一尾辿鰡鼓，咿呀嘿都真正趣味。
阿公仔欲煮鹹，阿媽仔欲煮汫，二個相拍撞破鼎，咿呀嘿叨啷噹叱噹嗆，哇哈哈。
阿公仔欲煮鹹，阿媽仔欲煮汫。二個相拍撞破鼎，咿呀嘿都啷噹叱噹嗆，哇哈哈。
撞破鼎，撞破鼎，撞破鼎，咿呀嘿都啷噹叱噹嗆，哇哈哈，哇哈哈，哇哈哈，哇哈哈。
29大頭旺仔一粒珠
大頭旺仔，伊叨一粒珠，相拍毋認輸。夯竹篙托金龜，金龜一下飛。
哎喲！大頭旺放風吹，風吹斷了線。大頭旺仔家伙，哎喲去一半。
30大箍呆
大箍呆哎喲白目眉，無人請你著家己來。來！來！大箍呆炒韭菜，燒燒一碗來，
冷冷阮無愛。大箍呆炒韭菜，燒燒一碗來，冷冷阮無愛。大箍呆，到今你才知，
到今你才知。
31ABC狗咬豬
ABC狗咬豬，阿公仔坐飛機，跋一下冷吱吱。叫醫生，來共伊醫，
醫一下跤骨大小支，醫一下跤骨大小支。
32烏面祖師公
烏面祖師公，白目眉。無人請，家己來。一個面仔笑咳咳，笑甲喙仔離獅獅。
到底笑啥代，舉椅頭仔加看麥。椅仔踏無在，跋落來，跋一個有喙齒無下頦，
真厲害，大聲細聲哀，無人知。